Öl skóla og ölþurrð í sveitinni

Eins og allir vita er ölið matvara og flokkast hér í landi jafnvel sem heilsufæði. Í matvörubúðum er það í hillum með vatni og ávaxtasafa. Á sumum vinnustöðum þykir það næstum jafn sjálfsagt og okkur þykir kaffibolli. Mér fannst því óskaplega gaman og til eftirbreytni að sjá kollega mína í Egå Gymnasium sitja með ölflöskur í höndum úti á svölum kennarastofunnar eftir vinnu á föstudaginn.

Ég gerðist auðvitað ölþyrstur við þá sjón, en fannst að rétt væri að blanda þó öldrykkju við frekari líkamsrækt, ekki síst vegna þess að þetta var á hefðbundnum fimmleikatíma. Ég greip því hjól mitt og hjólaði langt út í sveit. Þar heimsótti ég lítið þorp og ætlaði að leita þar uppi þorpskrána. Hún reyndist engin vera, en öl væri selt í matvörubúðinni. Þyrstur sem ég var lét ég mér það nægja, og hjólaði svo með nestið út á nærliggjandi akur og naut þess þar í veðurblíðunni.

Nokkrar nýjar myndir í flokknum "Haust í Árósum"

Athugasemdir

[einar (IP-tala skráð) 28.9.2006 kl. 10:47]

Eftir að hafa lesið þetta legg ég til að við tökum upp þettan sið á föstudögum. Byggjum sólpall sem nær úr frá Gamla skóla inn að Lystigarði. Liggjum svo þar í sólinni á föstudögum eftir vinnu og sötrum einn öl.