Engar fréttir??

Aldrei þessu vant er lífið þessa dagana í nokkuð föstum skorðum. Það viðrar ekki til ferðalaga, Bjarni í sínum skóla og handbolta, Gunna í sínum skóla með heilmikla heimavinnu og hjá mér er háskólinn kominn á fulla ferð.

Ég er svolítið þreyttur á "teóríukjaftæði" í tölvudeildinni, þannig að ég ætla ekki að sitja þar nema tvo áfanga, og aðeins annan þeirra af fullum krafti. Það er áfangi sem fjallar um hönnun margmiðlunarefnis og á að vera mikið verklegur. Raunar runnu á mig tvær grímur varðandi þann áfanga þegar farið var að ræða um hugsanlega verkefni. Allar hugmyndir og gömul verkefni sem kennarinn kom með virðast mér byggjast á að hanna listræna, stafræna viðburði í miðbænum. Ekki alveg minn stíll! Datt þó í hug að breyta Dómkirkjunni þannig að menn gætu með ljósasjói og öðrum kúnstum breytt henni í aðrar kirkjur að eigin vali. Þýðir ekkkert að ráðast á garðinn...

Ég er því búinn að skrá mig í áfanga í jarðfræðideildinni sem lofa góðu - gaman að rifja upp hluti sem maður á að kunna.

Svo er vetrarfrí hjá Bjarna í næstu viku. Við vorum löngu búin að ákveða að fara þá í ferðalag og eftir að hafa flakkað um vef Ryan Air enduðum við á því að kaupa farseðla til Barcelona. Er Örn Þór búinn að setja saman fyrir okkur hugmyndir að dagskrá sem eiga örugglega eftir að koma sér vel. Það er svo rúsínan í pylsuendanum er að mér tókst að verða mér úti um miða á Nou Camp á leik FC Barcelona á sunnudagskvöldið. Mér skilst að leikurinn verði sýndur á Sýn, við skulum veifa!!

Athugasemdir

[Helga Þyri Bragadóttir, 7.2.2007 kl. 23:26]

Jónas minn, mig langar að benda þér á að samkvæmt reynslu okkar frá HM handboltans, að til að komast í sjónvarpið þá þarftu; að vera ráðherra eða að vera tvítug falleg stúlka  eða vera með rautt mikið skegg.  Veit ekki alveg á hverju þú lumar...  Við bíðum spennt. 

Skemmtið ykkur vel. 

[Brynja (IP-tala skráð) 8.2.2007 kl. 22:09]

Finnst ykkur ekki gott að eiga rólegan tíma?  Ljúft að safna kröftum fyrir ferðirnar framundan, góða skemmtun í Barcelona.

Blessaður láta svo vaða með einhvern góðan gjörning með dómkirkjuna í aðalhlutverki.  Væri ekki sniðugt að auglýsa þjóðernið og jarðfræðiþekkinguna og varpa á hana einu góðu íslensku eldgosi eða óveðri og láta það skreyta  útveggi hennar um stund?

kraaam

frá Örebro