Táraflóð og önnur flóð

Hér gráta menn frammistöðu landsliða Íslands og Danmerkur á HM í handbolta. Bæði liðin eru komin upp að vegg og verða að vinna leikina á morgun. Og við sem vorum svo viss um að Ísland kæmist í milliriðla að við keyptum miða á leikina um næstu helgi og gistingu í Þýskalandi - við förum auðvitað og horfum á handbolta í heimsklassa, en því miður ekki með réttu liðunum!

Hér stytti upp í dag eftir rigningar síðustu daga. Allir fréttatímar eru undirlagðir af flóðamyndum, vegir lokaðir, jafnvel hér í úthverfum Árósa. Miðbærinn í Vejle lokaður, Silkeborg á floti og svo mætti áfram telja.

Þegar stytti upp ákváðum við að skreppa vestur í land. Komum fyrst við í Silkeborg og litum á flóðin þar. Þar náði vatnshæð sögulegu hámarki í gær, en var aðeins farið að sjatna í dag. Við skoðuðum síðan bæina Ikast og Herning okkur til ánægju. Gaman að koma þangað, þótt þeir þyki ekki með falelgustu bæjum landsins. Í Herning er stórskemmtilegt listasafn í gömlum verksmiðjuhúsum sem við skoðuðum um stund áður en við héldum aftur heim.

Athugasemdir

[Helga Þyri Bragadóttir, 21.1.2007 kl. 22:48]

Þið hefðuð átt að kíkja á Charolais kroen sem er (eða var allavega fyrir "nokkrum" árum) virkilega skemmtilegur veitingastaður í Herning, staðsettur í gamalli kirkju.  Ég veit að Bjarni hefði notið sín þar í frábærum nautasteikum. Þetta er reyndar það eina sem ég hef séð í Herning, kokkarnir að grilla í kórnum. Vildbjerg, þokkalegur smábær fellur undir Herning kommune. Þar eru um 25 fótboltavellir og eru Vildbjergbúar afar hreyknir af þeirri íþróttaaðstöðu sem þeir bjóða uppá og halda fjölmörg "Esso-mót" á sumrin. Bara svona ef ykkur langaði að vita þetta.