Handboltinn gengur upp og ofan

Lífið hérna snýst að hluta til um handboltann hjá Bjarna og Skovbakken. Það hefur fyrr komið fram hjá mér að hjá liðinu hans hefur flest gengið á afturfótunum. Var svo komið um áramót að áhuginn hjá strákunum var orðinn í lágmarki og lítil gleði í leikjunum, enda að litlu að stefna. Fyrir viku var tekin sú stóra ákvörðun að leggja flokkinn hans niður og færa strákana alla upp í meistaraflokk. Þar er haldið úti þremur liðum og var leikmannahópurinn þar orðinn heldur lítill.

Er skemmst af því að segja að þetta hefur gjörsamlega endurlífgað strákana, æfingar aftur skemmtilegar og krefjandi og þeir berjast fyrir stöðum í meistaraflokksliði númer 2, varla von að neinn þeirra muni spila með fyrsta liði. Verða þó líka að sætta sig við að spila stundum með þriðja liði meistaraflokks. Þeir styrkja hins vegar bæði liðin verulega og nú tapast varla leikur hjá félaginu.

Bjarni lenti í þó í því í dag að verða að spila með þriðja liði - og var ekki sáttur við það! Hann og annar strákur úr unglingaliðinu báru þó spilið uppi og skoruðu helming markanna. Liðið er samansett af nokkrum unglingum og svo "eldgömlum" handboltamönnum sem eru í þessu sér til gamans. Þótti Bjarna sumir úthaldslitlir og hægir yfirferðar. Lýsti því yfir í leikslok að gamlingjarnir í FIMMA (íþróttaliði kennara í MA) myndu valta yfir þetta lið, jafnvel þótt æfðu bara körfubolta!

Frammistaða Bjarna í leiknum verður vonandi til þess að hann fái að spila með liði 2 um næstu helgi.

Athugasemdir

[Lára (IP-tala skráð) 15.1.2007 kl. 11:49]

Þetta minnir svolítið á handboltaiðkun míns sonar. Hann spilar með meistaraflokki ÍR og hefur mjög gaman af. Hins vegar er staða liðsins í deildinni ekki til að hrópa húrra yfir...  Svo dúllar hann sér í verkfræðinámi með þessu - ég ætti að senda honum vatnsveðurspistilinn þinn, svona sem dæmi um víti til að varst!

[Guðjón H. Hauksson, 15.1.2007 kl. 16:03]

Hvernig er annars með Skemmtinefndina? Heldur hún sér eitthvað við með Baunum? Var ekki Mads búinn að redda samningi hjá einhverju stórliðinu í grenndinni?

[Sverrir Páll Erlendsson, 16.1.2007 kl. 10:22]

Heyrðu mig. Það er spurning hvort hann hefur með þessari athugasemd áunnið sér rétt eða fyrirgert honum til að spila með eða á móti FIMMA. Þetta þarf að taka fyrir á misserisráðstefnu FIMMA við tækifæri (hún er haldin að jafnaði á FIMM ára fresti).